مافيش حاجة اهم من انك تساعد اطفالك انهم يفكرو بشكل ابداعي ويكون عندهم القدرة علي حل مشاكلهم بنفسهم والتعود علي حل المشكلات بشكل ابداعي وفعال من وهما صغيرين ..

التفكير الابداعي وحل المشكلات موضوع في غاية الاهمية لانه بيساعد طفلك يكون فعال لنفسه اولا وبعد كدة للمجتمع بتاعه سواء المجتمع الصغير او الكبير 

الطفل بطبيعته ميال الي الاستكشاف والفضول وحب المعرفة , بالفطرة ميال الي التحرر من قيود الصح والخطاْ من كل القيود المفروضة علينا من المجتمع الخارجي والعادات والتقاليد 

طفلك بالفطرة مبدع حقيقي .. 

المبدع دة بيحتاج منك بيئة حاضنة للابداع بتاعة بيحتاج منك انه يعبر عن نفسه ويقدر بكل ثقة بالنفس بخرج الطاقة المكبوتة جواه من غير خوف او رهبة من الاهل سواء التريقة او العنف لمجرد انه بيتكلم كتير وبيقول كلام من نسيج خيالة عن حجات بتحصلة في المدرسة او مع اصحابه بيخلط بين الحقيقة والخيال وبين الواقع والكرتون الي بيشوفوة في التلفزيون 

الطفل المبدع مش بس الي بينجح في المدرسة .. ممكن يكون مبدعا في تأليف القصص أو التلوين والرسم او الرياضة او الموسيقي او اي عمل فني اخر سواء عضلي او ذهني

دورك تدور فعلا ابنك مبدع في اي مجال واتجاه  

بيتطلب منك ان طفلك يكون مبدع انك تكون مقتنع اقتناع تام بأن كل طفل جواه طاقة ابداعية جبارة ويقدر يكون مبدع لو توفرت له البيئة المناسبة 

ودول 10خطوات مهمين جداً لجعل اطفالك وأبنائك مبدعين بشكل ملحوظ

  شعور الطفل بالتقدير والتميز : دة احساس وشعور بينتقل منك الي الطفل كل ما كنت فخور بطفلك وبتقدره انتقل له الاحساس دة وخلاه اشجع 

دعم ثقة الطفل في نفسه : من خلال الكلامات والافعال الايجابية والتشجيعية 

عدم العقاب القاسي والتعرض للضرب : التعرض للأهانه الجسدية والنفسية بتخلق طفل مشوه معدوم الشخصية والقرار 

دع طفلك يخطئ : لما طفلك يخطئ بيتعلم من كل مرة بيخطئ فيها وبيزداد وعيه وقدرته علي حل المشكلات وحل المشكلات بشكل ابداعي 

التعود علي التغيير : عود طفلك انه التغيير سنه كونية وان كل حاجة حولينا بتتغير لان طفلك بيكرة التكرار وبيعشق التغيير فيشعر انه طفل طبيعي 

مساحة خاصة : خلي للطفل مساحة شخصية مكان للعب للنوم عودة يكون طفل مستقل مش تابع 

يأخذ قرارته : خليه هو يأخذ قرارته الخاصة عود طفلك انه سيد قرارة حتي في التفاصيل الصغيرة زي اللبس او الاكل او اللعب يختار هو لانه بعد كدة هياخد القرارات الكبيرة 

علمه يسأل : علم طفلك ازاي يسأل وامتى يسأل ما يسأل عنه طفلك يكون أهم من معرفته الإجابة على أسئلة الآخرين 

كثرة الاطلاع : حفز طفلك علي الاطلاع والقراءة والثقافة في كل المجالات علشان تخلق منه شخص واعي ومثقف 

الاستمرار : شجعة علي الاستمرار في اي عمل بيقوم بيه مهما كان وعرفة ان لازم يستمعت بالتجربة مش بس النهاية 

طفلك امانه بيحتاج منك مجهود انك تربية بشكل ابداعي ومميز .. كلنا في الاخر بنسعي لطفل بيستخدم قدرات دماغة الجبارة وبيعتمد عليها وتساعدة انه ينجح في المدرسة وكمان في حياته العمليه ويحصل علي الابداع الي يستحقه 

لما توصل طفلك للي يستحقة يبقي انت تستحق لقب اب او ام بجدارة .

http://ibrahimkhattab.com/event/%D8%AB%D9%86%D9%83%D9%88%D9%84%D9%88%D8%AC%D9%8A-%D8%B5%D9%86%D8%A7%D8%B9%D8%A9-%D8%A7%D9%84%D9%85%D9%81%D9%83%D8%B1/2016-03-03/