الإحساس بالقلق شعور طبيعي لازم يتعامل معاه الانسان زي اي شعور تاني ، وخصوصا اننا بنمر بتجربة جديدة مثيرة وصعبة ..

بحسب شبكة «بي بي سي» البريطانية، فقد يتسبب هذا القلق في مشكلات نفسية وعقلية كبيرة للأشخاص؛ خصوصاً مع شعورهم بعدم السيطرة على الأزمة، وبعدم معرفة كثير عن الفيروس؛ خصوصاً أنه فيروس جديد، وكثير من المعلومات الخاصة به لا تزال مجهولة.

التدفق الاخباري في كل وسائل التواصل الاجتماعي بيزود احساسنا بالمرض وبيقلل من المناعة بسبب الخوف الزيادة والمفرط والقلق بيخلي تركيزنا وافكارنا كلها في الفيروس ، في مجموعة خطوات ازاي تحمي نفسك واسرتك نفسيا زي ما انت واخد

زي ما انت بتاخد بالك ومركز جدااا ازاي تحمي نفسك واسرتك من فيروس الكورنا تعالي نتكلم عن 8 خطوات ازاي تحمي نفسك واسرتك نفسيا من فيروس كورنا :

1- خليك متوازن في تفاعلك وردود افعالك :

لازم تكون وسطي في وسط الاحداث السريعة والكتيرة الي بتحصل حوليك بدون مبالغة وكمان بدون لا مباله في مكان في النص انك تكون مهتم ومحضر نفسك وواخد كل الاحتياطات والاهم ان المصادر الي انت بتجيب منها معلوماتك تكون موثوقة لان دي صحتك وصحة اسرتك

2- شارك زوجتك :

دي فرصة جميلة انك تطور العلاقة بينك وبين زوجتك وتشاركها في اعمال البيت وتخلي العلاقة الزوجية ايجابية لان العلاقة الزوجية محتاجة تطور كل فترة وتهتم بكل الامور المنزلية زي انك تصلح اللمبة المحروقة من 7 شهور 😅😅 هيحسن الصحة النفسية للازواج

3- العب مع الاطفال :

دي فرصة حقيقية انك تعرف ابنك في سنة كام😅😅، وتعرف هواياته واهتماماته وتكون بالنسبة ليه الاب المثالي ده هيساعد في تحسين الصحة النفسية للاطفال

4- اهتم بنفسك وتعليمك وطور نفسك :

ده وقت انك تهتم بنفسك وتدلعها وتديها حقها انها تستريج وتطور بشكل ملحوظ طور عقلك ، هتلاقي حجات اوي انت مأجلها ارجع لها وطور من نفسك المهم حاول تاخد اجازة لانك تستحق وده علشان صحتك النفسية تكون افضل

5- الرياضة والجهد البدني :

مهم جداا وانت في البيت يكون عندك نشاط بدني ورياضي جوه البيت ، حتي لو كانت حجات بسيطة المهم انك تتحرك وتجري الدم في جسمك وجسم اطفالك لان بيقي من الاكتئاب

6- تواصل مع غيرك :

خلي دائما عندك يوميا تواصل مع اقاربك واصحابك وتكون مكالمات صوتيه وفيديو ، اخرج من فكرة انك معزول واستغل الوقت في انك تتكلم مع غيرك وتساعدهم وتتواصل معهم علشان تفرحهم وتفرح نفسك وتضمن سلامتك النفسية والعقلية طول الوقت

7- التزم بالعباده :

من اهم النقاط هي الاتزام بالعباده حتي وانت في البيت لان دي فرصه انك تبدأ تاني مع ربنا بداية جديدة وتجدد فيها النوايا للمغفرة وتكون قدوه لاطفالك في التوكل والاعتماد علي الله

8- خد استراحة من وسائل التواصل الاجتماعي :

ابدأ خلي فيه عادات جديدة في البيت وقت بدون مواقع التواصل .. تواصلو مع بعض بشكل حقيقي وفعلي خلي الحياة تكون مشوقة هاتو العاب بسيطة تقضو فيها وقت زي “الكوتشينة ، الطاوله ، العاب انتم بتحبوها الشرط الاساسي انها بدون اي تكنولوجيا علشان نفتح مجال جديد للتواصل الصحي

المهم انك تلتزم بالبيت اطول فترة ممكنة علشان تحد من انتشار المرض والمهم الالتزام بالقواعد علشان الفترة دي تعدي علي خير ..

ابراهيم خطاب