لما كنا صغيرين كنا بنتقارن مع ناس كتير .. اخويا .. اين خالتي … ناس ممكن يكونوا اشطر مننا … اقوى ..او أحسن في حاجة معينة .. او عندهم مهارة معينة مش عندنا ..
بعد شوية كبرنا وعرفنا ان المقارنه دي حاجة بتأذينا جدا ..
الي حوالينا بطلوا يقارنونا بحد .. بس فضل حتة جوانا لسا بتقارنا احنا بالناس التانية … لإننا تعودنا اننا نقارن نفسنا بالناس …
واصعب واسوا حاجة ممكن تعملها في حياتك انك تقارن نفسك بحد تاني .. بقدراته أو إمكانياته أو مهاراته .. وتقعد تشعر بالعجز .. تشعر بالإحباط … تشعر بالقلق .. وعدم الثقة بالنفس وعدم الثقة بقدراتك وامكانياتك وحياتك كلها لمجرد انك .. بتقارن نفسك بحد تاني .. او شايف ان الشخص التاني دا عنده حاجات أحسن منك ..
الفكرة كلها انك لازم توقف مقارنة بشكل كامل …
وقف مقارنة لانك مختلف ..
وقف مقارنة لانك تستحق تعيش بشكل افضل …
وقف مقارنة لأن التجربة مختلفة …
وقف مقارنة لأنك إنسان قوي وجميل .. عندك ميزات وهبات من الله محتاج انك تشوفها ..
وقف مقارنة عشان تقدر تجمع الصورة كاملة ..
وقف مقارنة عشان ترجع ثقتك في نفسك
عشان تقدر تنجج وتتميز وتطلع للنور لازم توقف مقارنة
عشان يظهرلك ملامح حقيقية جدية إنك انسان ناجح لازم توقف مقارنة بينك وبين أي حد تاني ..
الموضوع في البداية بيبقى صعب .. لأنك عندك فكرة قديمة عن نفسك انك شبه ناس كتير .. وهي دي الي بتخلينا دايما نقارن ..
الفكرة انك تقدر تشوف الحلو الي عند الناس وتحاول توصله … مش تقارن ضعفك او عدم وصولك بالمهارات الي عند الناس التانية …
خلي بالك إن المقارنه بتخلي عندك مشاعر سلبية كتير جدا .. زي الحقد والحسد والغل .. المقارنه بتخليك دايما في وضع ضعيف … وعندك دايما احساس انك مش كامل … معندكش قدرة انك توصل للمهارة او نفس المستوى للناس وصلوله …
المقارنه كل شوية بترجعك لورا .. بتخليك إنسان سلبي … وبتزود مساحة الضعف جواك …
غير الفكرة دي عن نفسك وبطل مقارنة نفسك بالناس عشان تلاقي نفسك الحقيقية .