عام دراسي جديد على الأبواب

بدأ البعض بالفعل من ايام قليله والبعض على أعتاب بداية العام الدراسي الجديد واستقبال رحلة كامله بما تحمله من روتين كامل من الاستعدادات للمذاكرة والاختبارات والدرجات وغيره ..

لكن الجدير بالذكر اننا بنركز دائماً على الاستعداد للعام الدراسي للأولاد وبنجهل بشكل كبير الحاجه للإستعداد النفسي للأم ..

ولأنك انتى أساس البيت وعمود الأسرة فالاستعداد الحقيقى لن يتم إلا من خلالك ..

اذا كيف تستعدي انتى وطفلك نفسياً وجسدياً للدراسة ؟

المقصود بالأستعداد النفسي هو كل ما يشمل افكارك ومعتقداتك وعاداتك بخلاف روتين يومك اللى بيعد من قبيل الاستعداد الجسدي

1 الأهداف

• فى البداية مهم تحددى الهدف بالنسبالك من الدراسة ودا بيفرق بشكل كبير جدا فى رؤيتك الصورة من الخارج بشكل أكثر واقعيه، هل الهدف فقط هو تحقيق افضل الدرجات لأبنائك والسعي للمثاليه ولا الهدف الأساسي هو التعلم وبناء إدراك وشخصية ابنك او بنتك اللى بيكون الجزء الأهم منها نفسيته وثقته بنفسه وشعوره بفخر والديه بيه بغض النظر عن درجاته، وطبعا دا لا ينفى اهميه النجاح وقيمة التفوق ولا ينكر تشجيعنا لأولادنا على تحقيق افضل الدرجات لكن بيجعلنا على بصيرة اكبر بالهدف الحقيقى عشان مننجرفش للضغط العصبى والتوتر ومقارنة الاولاد بأقرانهم وغيره من التصرفات اللى بيكون مردودها السلبى اكبر بكتير .

2 انتِ الأساس

• مهم جدا فى البداية تستعدى بالتخطيط لروتينك الجديد، تستعدى لاختلاف مواعيد استيقاظك ومواعيد النوم بالنسبة لك أو لأبنائك، وتبدأي فى تحديد مواعيد عملك ، أو اعمال المنزل ، بالأضافة لوقتك الخاص بيكى للاستجمام والراحة والهدوء أو الترفيه أو ممارسة أى نشاط بيشحن طاقتك من جديد

3 واجهي الأفكار السلبي

• استعدادك لروتينك الخاص هيقلل من الشعور السلبى اللى احيانا بيلازم الأمهات وقت الدراسة من ضغط وتوتر كمان هيقلل من تزاحم المواعيد أو المهام والمسؤوليات عليكى

• فى حال أن نتائج السنه الماضية لم تكن الافضل مهم اننا نبدأ العام الجديد بنيه جديدة ، بدون تركيز على السنه الماضيه ، لكن نكتفى بأننا نتعرف فى اسباب الإخفاق وازاى تتجنبها عشان نقدر نحقق افضل نتيجه ممكنه

• نجاح أبناءك دليل اجتهادهم واجتهادك فى دعمهم ، اخفاقهم لا يعنى اخفاقك أو فشلك دى تجربتهم وانتى مجرد مرشد ليهم فى التجربة

4 الحوار

ابدأى للتخطيط للعام الجديد بالحوار مع ابنائك لدعم استعدادهم النفسي
شاركيهم العادات الجديدة اللى حابه يتبنوها
شاركيهم المواعيد الجديده للاستيقاظ والنوم والدراسه

• لو دا اول عام دراسي الاول لابنك ابدأى بالحوار معه عن المدرسة ومميزاتها            ( بدون مبالغه ) وعن تكوين اصدقاء وعن الأنشطة المحببه ليه اللى هيقدر يمارسها داخل المدرسة من رسم ولعب مع الأصدقاء
الحوار هيطمنه لأنه اغلب الاطفال بيكون عندهم رهبه من التجربه خصوصا انها مجهولة بالنسبة ليهم واللهم هو الخوف من الوقت اللى هيقضيه فى المدرسة بدونك فلغة الحوار هتطمن خوف أو رهبة ابنك بشكل كبير

5 التهيئه

مهم جدا ضمن الاستعدادات زى شراء ملابس المدرسة الجديدة والادوات هو تجهيز مكان خاص بالمذاكرة وأدوات محببه لأطفالكم بيساعدك بشكل كبير على خلق مناخ مريح وحالة من الحماس والتحفيز

كمان بيساعدك على تقليل حجم الفوضى فى البيت كله لما نحدد مكان واحد فى أغلب الوقت للمذاكرة

اما عن الاستعداد الجسدي

• فالنوم ثم النوم، مهم جدا ليكى ولطفلك النوم بعدد ساعات كافي، دا يعزز ويقوى التذكر والنوم لطفلك والحالة المزاجية أيضا ليكى وليه

• الغذاء ، مهم جدا الالتزام بغذاء صحى كامل متوازن والتركيز على الخضورات والبروتين وتناول السمك والعسل والزبادي وحبوب البليلة والبيض من الاكلات اللى بتكون ذات تأثير قوي ايجابى على صحة ابنك